પુરુષોત્તમ ઉપાધ્યાયને 'મુનશી સન્માન' થી વિભૂષિત કરાયા

બહુઆયામી પ્રતિભા ધરાવતા ભારતીય વિદ્યા ભવનના સ્થાપક ડૉ. કે. એમ. મુનશીની સ્મૃતિને અંજલિ રૂપે અપાતું 'મુનશી સન્માન' મૂર્ધન્ય ગાયક-સ્વરકાર પુરુષોત્તમ ઉપાધ્યાયને અર્પણ કરવાનો સમારંભ ગયા શુક્રવારે ભવન્સ ઓડિટોરિયમ (ચોપાટી) ખાતે યોજાઈ ગયો. મરાઠી સંગીતના પ્રતિભાવંત સર્જક હૃદયનાથ મંગેશકર આ પ્રસંગે અતિથિ વિશેષ રૂપે ઉપસ્થિત રહ્યા હતા.
ભવનના એકઝીક્યુટીવ સેક્રેટરી હોમી દસ્તુરજીએ એમના સ્વાગત પ્રવચનમાં, હૃદયનાથજીને માત્ર મહારાષ્ટ્ર કે દેશના જ નહીં પરંતુ આંતરરાષ્ટ્રીય કક્ષાના સર્જક લેખાવ્યા હતા. દસ્તુરજીએ જણાવ્યું હતું કે પુરુષોત્તમભાઈએ ગાયક અને સ્વરકાર તરીકે ગુજરાતી સુગમ સંગીત ક્ષેત્રે જે અપ્રતિમ પ્રદાન કર્યું છે, એને અનુલક્ષીને તેમને આ સન્માનથી વિભૂષિત કરાઈ રહ્યા છે. પુરુષોત્તમભાઈએ અનેક નવા કલાકારોને તાલીમ કે માર્ગદર્શન આપી ગુજરાતી સંગીતની એકથી વધુ પેઢીઓ તૈયાર કરી છે, તેનો દસ્તુરજીએ સવિશેષ ઉલ્લેખ કર્યો હતો.
હૃદયનાથજીએ પુરુષોત્તમભાઈ તથા પોતે કારકિર્દીઓની શરૂઆતથી જ એકમેકની નિકટ રહ્યા છે તે વાતનો રસપ્રદ પ્રસંગો સાથે ઉલ્લેખ કર્યો હતો તેમજ પુરુષોત્તમભાઈને સમગ્ર મંગેશકર પરિવારના પ્રેમ તથા આદરને પાત્ર ગણાવ્યા હતા. તેમણે જણાવ્યું કે લતા દીદીએ આ પ્રસંગે પુરુષોત્તમભાઈને શુભેચ્છા પાઠવી છે.
પોતાનો પ્રતિભાવ વ્યક્ત કરતાં પુરુષોત્તમભાઈએ કયું કે છેલ્લા છ દાયકાથી ભવન પરિવારના સભ્ય અને મુનશીજીના પ્રીતિપાત્ર બની રહ્યાનું પોતે ગૌરવ અનુભવે છે. તેમણે મંગેશકર પરિવાર સાથેની પોતાની નિકટતાની વિગતથી વાત કરી હતી.
હૃદયનાથજીને હસ્તે પુરુષોત્તમભાઈને 'મુનશી સન્માન'નું સ્મૃતિચિન્હ તથા રૂપિયા એક લાખનો ચેક અર્પણ કરાયાં હતાં. દસ્તુરજીએ હૃદયનાથજીનું શાલ ઓઠાડીને સન્માન કર્યું હતું. પુરુષોત્તમભાઈનાં પત્ની ચેલનાબેન મંચ ઉપર ઉપસ્થિત હતાં.
સન્માન સમારોહ પછી સુગમ સંગીતના ટોચના કલાકરો દ્વારા ગુજરાતી ગીતોની રજૂઆત થઇ હતી. સમગ્ર કાર્યક્રમનું સંચાલન જાણીતા અભિનેતા સનત વ્યાસે કર્યું હતું.